Kalisiya Worship

زِندہ خُدا ہَے ہَمارا

چاند سُورج کی پرستش ہم نہیں کرتے
دُنیا کے معبُودوں کے آگے نہیں جُھکتے
کیونکہ زِندہ خُدا ہے ہمارا
زِندہ خُدا ہے ہمارا

تیرے غم کو بڑھا دیں گے
وہ تجھے نہ شِفا دیں گے
جو ہُؤئے مِٹّی کے ڈھیر
وہ کِسی کو کیا دیں گے
اِس لِئے دَر غیروں کے، ہم نہیں جاتے
کیونکہ زِندہ خُدا ہے ہمارا۔۔۔

ہونٹھ ہیں بول سکتے نہیں
آنکھیں ہیں دیکھ سکتے نہیں
اِن بُتوں سے کیا حاصِل
ہاتھ ہیں چُھو سکتے نہیں
اَیسے خُداؤں پر اِیماں، ہم نہیں رکھتے
کیونکہ زِندہ خُدا ہے ہمارا۔۔۔

جب سِتائش ہوتی ہے
رُوح کی بارش ہوتی ہے
یِسُوع تیری حضوری میں
رُوح کی جُنبِش ہوتی ہے
تیری قُوّت سے خالی، ہم نہیں رہتے
کیونکہ زِندہ خُدا ہے ہمارا۔۔۔

خُوشخبری پَھیلائیں گے
رُوح میں بڑھتے جائیں گے
کھوئے سب اِنسانوں کو
پاس یِسُوع کے لائیں گے
شیطانوں کے طُوفانوں سے، ہم نہیں ڈرتے
کیونکہ زِندہ خُدا ہے ہمارا۔۔۔

جب تیری رحمت ہوتی ہے
ناکام مُقام مِل جاتے ہیں
یِسُوع تیری رحمت سے، دُعا قبُول ہو جاتی ہے
تیرے مجمعے سے خالی، ہم نہیں جاتے
کیونکہ زِندہ خُدا ہے ہمارا۔۔۔

شاعِر اور دُھن ساز : کَلِیم عِمّانُؤئیل